Ազգային ժողովի նախագահ Ալեն Սիմոնեանը հանդիպած է գերիներու ու անհետ կորած համարուող զինծառայողներու հարազատներու հետ, որու ընթացքին պայմանաւորուածութիւն ձեռք բերուած է մանրամասները չհրապարակելու վերաբերեալ։
«Քիչ առաջ աւարտուեց հանդիպումս գերիների եւ անհետ կորածների հարազատների հետ:
Բոլոր տղաների ողջ եւ առողջ Հայաստան վերադարձի ուղղութեամբ տարուող մեր ջանքերը չեն դադարել ու չեն դադարելու:
Շնորհակալ եմ հանդիպման համար», -Ազգային ժողովի նախագահ Ալեն Սիմոնեանը գերիներու եւ անհետ կորածներու հարազատներու հետ հանդիպումէն ետք ֆէյսպուքեան գրառում ըրած է:
Նշենք, որ այսօր գերեվարուած եւ անհետ կորած համարուող զինծառայողներու հարազատները փակած էին Բաղրամեան պողոտան։ Անոնք կը պահանջէին հանդիպում ԱԺ նախագահի հետ, որպէսզի վերջինս բացատրութիւն տայ գերիներու մասին իր յայտարարութիւններու վերաբերեալ։
