Նախկին հանրապետական ծերակուտական Ճեֆ Ֆլէյք՝ Թուրքիոյ մէջ ԱՄՆ-ի յաջորդ դեսպանի թեկնածուն, Օսմանեան կայսրութեան կողմէ հայերու դէմ իրականացուած զանգուածային ոճրագործութիւնները պաշտօնապէս ճանչցած է որպէս Ցեղասպանութիւն՝ հակադարձելով այդ հարցին վերաբերեալ իր նախկին դիրքորոշման:
Ֆլէյք հաստատակամօրէն «այո» պատասխանած է, երբ Ծերակոյտի արտաքին յարաբերութիւններու յանձնաժողովի նախագահ Պոպ Մենենտես հարցուցած է՝ արդեօք ան փոխա՞ծ է իր դիրքորոշումը եւ պատրաստ է «միանալու այս մարմինին եւ վարչակազմին՝ Հայոց Ցեղասպանութիւնը վերահաստատելու համար»:
Թէ՛ Ներկայացուցիչներու պալատին մէջ եւ թէ՛ Ծերակոյտին մէջ եղած ժամանակ՝ 2005, 2007, 2010 եւ 2014 թուականներուն, Ֆլէյքը դէմ քուէարկած է Ցեղասպանութեան մասին Քոնկրէսի օրինագիծերուն:
Բացի այդ, Ֆլէյքը անդրադարձած է նաեւ հայ-ատրպէյճանական հակամարտութեան՝ Թուրքիոյ դերը բնութագրելով որպէս ապակայունացնող:
«Եթէ թեկնածութիւնս հաստատուի, պիտի խրախուսեմ Թուրքիային աջակցելու Հայաստանի եւ Ատրպէյճանի միջեւ հակամարտութեան կայուն երկարաժամկէտ լուծում գտնելու ջանքերուն եւ պիտի խրախուսեմ Արեւելեան Միջերկրական ծովին մէջ տարաձայնութիւններու խաղաղ եւ դիւանագիտական լուծումներու հարցին մէջ», ըսած է ան:
