ՀՀ ԱԳՆ-էն յայտնած են, որ նախարար Արա Այվազեանն Իրանի ԱԳ նախարար Մոհամմատ Ժաուատ Զարիֆի հետ ընդլայնուած կազմով հանդիպման ժամանակ ըսած է.
«Այժմ մեր տարածաշրջանն առերեսւում է նոր լրջագոյն մարտահրաւէրների, որոնք ստեղծուել են ղարաբաղեան հակամարտութիւնն ուժով լուծելու Ատրպէյճանի վտանգաւոր փորձի արդիւնքում: Հայաստանը չի համարում, որ Արցախի դէմ Ատրպէյճանի յարձակման եւ ուժի կիրառման արդիւնքները կարող են հիմք ստեղծել տեւական խաղաղութեան համար կամ դիտարկուել որպէս տարածաշրջանային համագործակցութեան հնարաւորութիւն:
Իրանը տարածաշրջանում կարեւոր երկիր է, եւ մենք յարգում ենք Իրանի մօտեցումները, որով նա կառուցում է իր յարաբերութիւններն անմիջական հարեւանների հետ: Այնուհանդերձ, կ’ուզենայինք մէկ անգամ եւս շեշտել, որ միայն յարատեւ եւ բոլորի շահերը հասցէագրող խաղաղութիւնը, որտեղ չկան «յաղթողներ եւ պարտուողներ», այսպէս կոչուած, «յաղթանակներ կամ պարտութիւններ», կարող է իրական երաշխիքներ ստեղծել տարածաշրջանում անվտանգութեան, կայունութեան եւ զարգացման առաջմղման համար»:
