Ատրպէյճանի զինուժը այսօր գիշեր փակած է Գորիս-Ստեփանակերտ մայրուղին` Աղաւնօ եւ Տեղ գիւղերու միջեւ եղած հատուածը: Այս մասին յայտնած են Արցախի Հանրապետութեան ներքին գործոց նախարարութեան ոստիկանութենէն։
«Արդէն պատրաստ է փակուած ճանապարհը շրջանցող՝ Սիւնիքի մարզի Տեղ-Կոռնիձոր գրունտային նոր ճանապարհը, որը միանում է 2022թ. օգոստոսին շահագործման յանձնուած նոր՝ Կոռնիձոր-Հին շէն ճանապարհին («Բերձորի (Լաչինի) միջանցքին»): Տեղ-Կոռնիձոր նշուած ճանապարհի ասֆալտապատման աշխատանքները Հայաստանի Հանրապետութեան կողմից ընթացքի մէջ են»,- նշուած է հաղորդագրութեան մէջ։
Ներքին գործոց նախարարութիւնը կ’իրազեկէ, որ Տեղ-Կոռնիձոր գրունտային ճանապարհը երթեւեկելի է եւ, հաշուի առնելով Արցախի շարունակուող շրջափակումը, այդ ճանապարհով հնարաւոր է իրականացնել Արցախի մարդասիրական մատակարարումները ռուս խաղաղապահներու եւ Կարմիր խաչի միջազգային կոմիտէի կողմէ: Այդ ճանապարհը, ի դէպ, Արցախի Հանրապետութեան սահմանին՝ Հակարի գետի կամուրջի մօտ կը վերահսկուի ռուսական խաղաղապահ զօրակազմի կողմէ։
Յիշեցնենք, որ սկսած 2022 թուականի դեկտեմբեր 12-էն, ատրպէյճանական կողմը փակած է Արցախը Հայաստանին կապող միջպետական մայրուղիի Շուշիի հատուածը։ Եւ արդէն 108 օր շարունակ Արցախի բնակչութիւնը զրկուած է արտաքին աշխարհի հետ կապէն:
