ՀՀ գլխաւոր դատախազի խորհրդական Գոռ Աբրահամեանը դիմատետրեան իր էջին գրառում կատարած է Արցախի Հանրապետութեան Շոշ գիւղի մօտ կատարուած դէպքի վերաբերեալ․
«Շոշ գիւղի մօտ ճարտարապետական աշխատանքներ իրականացնող բնակչի, ԱՀ ՊԲ զինծառայողների ուղղութեամբ հակառակորդի կողմից կրակելու դէպքի առթիւ քրէական գործ է յարուցուել։
2021թ. Մայիսի 17-ին՝ ժամը 17.05-ի սահմաններում Ատրպէյճանի ԶՈՒ մի խումբ զինծառայողներ, ազգային ատելութեան շարժառիթներով, երկու եւ աւելի անձանց սպանելու, ուրիշի գոյքը դիտաւորութեամբ ոչնչացնելու նպատակներով հրաձգային զինատեսակների գործադրմամբ մօտ 7 րոպէ անընդմէջ թիրախային կրակ են վարել N զօրամասի պահպանութեան ներքոյ գտնուող մարտական դիրքերից մէկում ճարտարապետական աշխատանքներ կատարող ԱՀ Մարտունու շրջանի Սոս գիւղի բնակչի կողմից այդ պահին շահագործուող էքսկավատորի (հողափոր) եւ մարտական դիրքի անձնակազմի ուղղութեամբ:
Դրա արդիւնքում ամբողջութեամբ վնասուել են էքսկավատորի (հողափոր) դիմային եւ ձախ կողային դռան ապակիները՝ պատճառելով զգալի չափերի գոյքային վնաս: Ըստ էութեան սպանութիւնների յանցագործութիւնն աւարտին չի հասցուել միայն այն պատճառով, որ աշխատանք կատարող քաղաքացիական անձը եւ ժամկէտային զինծառայողներն այդ պահին կարողացել են պատսպարուել:
Դէպքի առթիւ ՀՀ ՊՆ Հադրութի ՌՈ բաժնում ՀՀ քրէական օրէնսգրքի 34-104-րդ յօդուածի 2-րդ մասի 1-ին, 7-րդ եւ 13-րդ կէտերի, ինչպէս նաեւ 185-րդ յօդուածի 2-րդ մասի 4-րդ կէտի յատկանիշներով յարուցուել է քրէական գործ, որով նախաքննութիւնն իրականացուում է ՀՀ ՔԿ ԶՔԳՎ 1-ին կայազօրային քննչական բաժնում»:
