Արցախի կարգավիճակին վերաբերեալ այս փուլին որեւէ փաստաթուղթ չի քննարկուիր, կառավարութեան նիստին յայտարարած է Արցախի նախագահ Արայիկ Յարութիւնեանը: Անոր խօսքով` ՀՀ վարչապետին հետ կայ յստակ պայմանաւորուածութիւն, որ Արցախի հետագայ կարգավիճակին հետ կապուած միջազգային մակարդակով որեւէ քննարկման պարագային հայկական կողմին դիրքորոշումը պէտք է համաձայնեցուած ըլլայ Արցախի իշխանութիւններուն եւ ժողովուրդի կարծիքին հետ:
Արայիկ Յարութիւնեան, ըստ նախագահի աշխատակազմին հաղորդման, ներկայացուցած է տիրող ռազմաքաղաքական իրավիճակը եւ Արցախի շուրջ արտաքին քաղաքական վերջին զարգացումները, մասնաւորապէս` վերջերս Նիկոլ Փաշինեանի մասնակցութեամբ Պրիւքսէլի մէջ (Փաշինեան-Ալիեւ-Միշէլ) եւ Մոսկուայի մէջ (Փաշինեան-Փութին) կայացած հանդիպումներու ծիրին մէջ:
Բացի այդ, ան յանձնարարած է կառավարութեան անդամներուն ցուցաբերել նախաձեռնողականութիւն` պետական մակարդակով ՀՀ գործընկեր գերատեսչութիւններու հետ կապերը աւելի ամրապնդելու ուղղութեամբ:
