ԵՄ-ն կ’ողջունէ Ատրպէյճանի կողմէ 5 հայ ռազմագերիներու ազատ արձակումը, որոնք գերեվարուած էին նոյեմբերին, եւ կոչ կ’ընէ անյապաղ ազատ արձակելու մնացած 57-ը: Այս մասին Twitter-ի իր էջին գրած է ԵՄ արտաքին յարաբերութիւններու հարցերով քարտուղար Փիթըր Սթանոն:
Անոր խօսքով՝ «այդ կը նպաստէ երկու երկիրներու միջեւ վստահութեան ամրապնդման, որ կարեւոր է տարածաշրջանին մէջ ամուր խաղաղութեան համար»:
Յիշեցնենք, որ երէկ ռուս խաղաղապահներու միջնորդութեամբ Ատրպէյճանը Հայաստանին փոխանցած էր 5 ռազմագերիներ, Երեւանը փոխանցած էր՝ մէկ:
Նշենք, որ մինչ օրս յայտնի չէ Ատրպէյճանի մէջ պահուող հայ ռազմագերիներու յստակ թիւը: Իշխանութիւնները կը հրաժարին յստակ թիւ նշել՝ յղում ընելով «պետական գաղտնիքին», եւ այն, որ այդ «կրնայ վնասել անոնց ազատ արձակման գործընթացին»:
Ոչ պաշտօնական տուեալներով՝ անոնց թիւը կը տատանի 100-էն 235-ի միջեւ:
