18 փետրուարին, Միւնիխի անվտանգութեան համաժողովի ծիրէն ներս տեղի ունեցած է ՀՀ վարչապետ Նիկոլ Փաշինեանի, ԱՄՆ-ի արտաքին գործոց նախարար Էնթընի Պլինքընի եւ Ատրպէյճանի նախագահ Իլհամ Ալիեւի եռակողմ հանդիպումը:
Հանդիպման ընթացքին անդրադարձ կատարուած է Հայաստանի եւ Ատրպէյճանի միջեւ խաղաղութեան պայմանագրի նախագիծի շուրջ աշխատանքներու ընթացքին, ինչպէս նաեւ տարածաշրջանային փոխադրային ենթակառուցուածքներու ապաշրջափակման ու երկու երկիրներու միջեւ սահմանազատման իրականացման` համաձայն Փրակայի մէջ ձեռք բերուած պայմանաւորուածութեան:
Վարչապետ Փաշինեան վերահաստատած է հայկական կողմի նպատակամղուածութիւնը` հասնելու այնպիսի պայմանագրի ստորագրման, որ իսկապէս կ’երաշխաւորէ տարածաշրջանի երկարաժամկէտ խաղաղութիւնն ու կայունութիւնը:
Միեւնոյն ժամանակ, Նիկոլ Փաշինեան ընդգծած է Ատրպէյճանի կողմէ Լաչինի միջանցքի ապօրինի շրջափակման ու անոր հետեւանքով Լեռնային Ղարաբաղի մէջ առաջացած մարդասիրական, բնապահպանական եւ ուժանիւթի ճգնաժամի փաստը:
Կարեւորուած է Հայաստանի եւ Ատրպէյճանի միջեւ խաղաղութեան գործընթացի շարունակականութեան ապահովումը:
