Հայաստան Հիմնադրամը պիտի կազմակերպէ իր 23-րդ ամենամեայ միջազգային Գոհաբանութեան Օրուայ հեռուստամարաթոնը՝ Նոյեմբեր 26-ին, երեկոյեան ժամը 4-էն 8-ը (Ա.Մ.Ն. խաղաղական ափ) կամ երեկոյեան 7-էն 11-ը (արեւելեան ափ), միացնելով հայ-ամերիկեան համայնքը՝ զօրութեան եւ նուիրումի ցուցադրութեամբ՝ օգնելու հայրենիքի անոնց, որոնք կը դիմագրաւեն իրենց ամենադժուար ժամանակաշրջանը սերունդի մը մէջ։
Անվտանգութեան նկատառումներով՝ մեր կամաւորներուն, հաղորդավարներուն եւ անձնակազմին համար պիտի հետեւինք COVID-19 բոլոր արձանագրութիւններուն, եւ ձեռնարկը պիտի հեռարձակուի աշխարհի հանդիսատեսին համար armeniafund.org կայքէջին վրայ, ինչպէս նաեւ պիտի հեռարձակուի ամբողջ երկրով մէկ՝ DirectTV (ալիք 325/91) եւ U-Verse (ալիք 198/429/1198/1429) միջոցով։ Անիկա պիտի ըլլայ նաեւ հասանելի օդային հեռարձակմամբ՝ Մեծ Լոս Անճելըս տարածքին մէջ (KVMD ալիք 31 կամ 23), Սան Ֆրանսիսքոյի եւ ծովածոցի տարածքին մէջ (KTSF ալիք 8 կամ 26), Ֆրեզնոյի եւ Կեդրոնական Գալիֆորնիոյ մէջ (KGMC ալիք 10 կամ 43), եւ Նիւ Եորք/Նիւ Ճըրզի մեթրոփոլիթեն տարածքին մէջ (WMBC ալիք 10 կամ 63)։ Բացի անկէ, մեր հեռախօսային կեդրոնը պիտի գործէ արտաքին վայր մը՝ անվտանգութեան նկատառումներով։
«Լոյս տալով Արցախի եւ Հայաստանի վերջին զարգացումներուն՝ 2020 Հեռուստամարաթոնը պիտի կեդրոնանայ 100,000 փախստականներու եւ տեղահանուած անձերու, ինչպէս նաեւ մեր զոհուած զինուորներու ընտանիքներուն օժանդակելուն վրայ, որոնք կորսնցուցին իրենց կեանքը՝ պաշտպանելու երկու հանրապետութիւններու ինքնիշխանութիւնը», ըսաւ Հայաստան Հիմնադրամի խորհրդի ատենապետուհի Մարիա Մեհրանեան։ «Նպատակն է ֆինանսական օժանդակութիւն շնորհել այս ընտանիքներուն, օժանդակել տեղահանուած երեխաներու կրթութեան, եւ բնակարան եւ պարագաներ ապահովել մէկ տարուան համար բոլոր անոնց համար, որոնք տեղահանուած են թրքական աջակցութեամբ ազրպէյճանական ուժերու անհիմն ագրեսիայի պատճառով»։
#ArtsakhStrong քարոզարշաւին առաջին ամսուան ընթացքին, Հայաստան Հիմնադրամը Ամերիկայի Միացեալ Նահանգներու մէջ արդէն իսկ հանգանակած է գրեթէ 80 միլիոն տոլար համայնքէն՝ օգնելու վերջին բռնութիւններով տեղահանուածներուն, որոնց մեծամասնութիւնը ստիպուած եղան հեռանալ իրենց տուներէն դատարկ ձեռքերով՝ ձմեռուան սկիզբին։ Հիմնադրամը ապահոված է ժամանակաւոր ապաստան, անցումային բնակարաններ, փոխադրութիւն, սնունդ եւ բժշկական խնամք՝ օգնութեան կարիք ունեցողներուն համար, եւ ստացուած իւրաքանչիւր տոլար բացառապէս մարդասիրական նպատակներու համար յատկացուած է։
Մինչ տեղում իրավիճակը օրէ օր կը փոխուի եւ Հայաստանի եւ Արցախի ժողովուրդը կը սգայ եւ կը խորհրդածէ, Հայաստան Հիմնադրամը կը քայլէ առաջ՝ օգնելու մեր ժողովուրդին գոյատեւել այս մեծ դժուարութեան շրջանը։ Մենք կեդրոնացած ենք օգնելու մեր հայ եղբայրներուն եւ քոյրերուն վերակառուցել եւ բարգաւաճիլ, եւ մենք միացած ենք անոնց հետ այժմ աւելի քան երբեւէ՝ օգնելու անոնց յառաջանալ աւելի զօրեղ։
