Միացեալ Նահանգները մտահոգուած է Հայաստանի եւ Ատրպէյճանի սահմանի երկայնքով գրանցուող միջադէպերով, յատկապէս՝ Երասխ/Սադարակ հատուածի վերջին դէպքերով: Այդ մասին յայտնած է Հայաստանի մէջ ԱՄՆ դեսպանութիւնը։
«Մենք երկու կողմին կոչ կ’ընենք արագ եւ խաղաղ կերպով թուլացնելու լարուածութիւնը եւ առարկայական բանակցութիւններու վերսկսման տիրոյթ ստեղծելու»,- ըսուած է դեսպանատան դիմատետրեան գրառման մէջ:
Յիշեցնենք՝ պաշտպանութեան նախարարութիւնը այսօր տեղեկացուցած է, որ մինչեւ ուշ գիշեր գնդակոծուած է հայ-ատրպէյճանական սահմանը Երասխի հատուածին մէջ: Նաեւ նշուած է, որ փոխհրաձգութեան հետեւանքով վիրաւոր է գիւղապետը։
