Սեպտեմբերի 22-ը անձրևային էր Գյումրիում, փոխարենը արևոտ էր գյումրեցի մանուկների տրամադրությունը:
Իրականություն դարձավ ՌԱԿ Շիրակի շրջանակի «Փանոս Թերլեմեզյան» երիտասարդական ակումբի նախաձեռնությունը` բեմադրել և տպագրել ակումբի անդամներ, ԵԿԹՊԻ Գյումրու մասնաճյուղի մագիստրատուրայի ուսանողուհիներ Տաթևիկ Պետրոսյանի և Նադեժդա Ավետիսյանի հեղինակած «Միմզի մոլորակը» հիասքանչ հեքիաթ-թատերգությունը:
Բեմադրությունը նույնպես կյանքի կոչեցին պիեսի հեղինակները` իրենց իսկ նկարչական և երաժշտական ձևավորմամբ, խմբագիրը Գյումրու Վ.Աճեմյանի անվ. դրամատիկական թատրոնի դերասան Արսեն Միքայելյանն է:
Գիրք-հեքիաթը գունավոր նկարազարդել է ակումբի անդամ Անի Խաչատրյանը:
Ներկայացման մասնակից-դերակատարները Գյումրու «Նարեկ» թատերական ստուդիայի 4-14 տարեկան 14 երեխաներն են` բեմադրիչներ-պիեսի հեղինակների ղեկավարությամբ:
Պիեսն ունի բարոյախրատական նշանակություն: Այն գոյություն չունեցող մոլորակի մասին է, որտեղ բնակվում են միայն փոքրիկները և պատասխանատու են տիեզերքում կատարվող մեծ երևույթների համար:
Պիեսը սովորեցնում է, թե իրականում որքան ուժ կա փոքրիկների մեջ և, թե յուրաքանչյուրն ինչքան բան կարող է անել Մոլորակն ավելի լավը դարձնելու համար:
Առաջնախաղը և գիրք-հեքիաթի շնորհանդեսը մեծ հաջողությամբ կայացավ ԵԹԿՊԻ Գյումրու մասնաճյուղի դահլիճում, որտեղ առաջին շարքում, իհարկե, երեխաներն էին:
Բեմադրության և հեքիաթի տպագրությունը իրականացվեց ՌԱԿ Հանրապետական վարչության հովանավորութամբ:
Միջոցառմանը ներկա էին ՌԱԿ ԱՄՆ, Ավստրալիայի, Հորդանանի և Լիբանանի շրջանակների ատենապետներն ու անդամները` Կենտրոնական վարչության փոխատենապետ ընկեր Ալեքսան Կարադանայանի և ՌԱԿ Հանրապետական վարչության անդամները` ատենապետ ընկեր Հրաչյա Կարապետյանի գլխավորությամբ:
Նախքան միջոցառումը երկու` Սփյուռքի և Հայաստանի վարչությունների անդամները ՌԱԿ Շիրակի շրջանային գրասենյակում ունեցան հանդիպում և համատեղ քննարկում կուսակցական գործերի վերաբերյալ` կարևորելով ՌԱԿ Սփյուռք-Հայաստան միասնական և համատեղ փոխշփումներն ու միջոցառումները: Երկու վարչությունների ներկայացուցիչները բարձր գնահատեցին օրվա միջոցառման կարևորությունը և կազմակերպիչների ջանքերը:
Առաջնախաղ-շնորհանդեսն անցավ ջերմ մթնոլորտում, փոքրիկ հանդիսականն ու նրանց ավագ ուղեկիցները բուռն ծափերով ու ծաղիկներով գնահատեցին թե՛ փոքրիկ արտիստներին, թե՛ պիեսի հեղինակներին:
Առաջնախաղի և փոքրիկների թատերախաղի մասին իր բարձր գնահատականը հայտնեց նաև միջոցառման հյուր, Ստեփանակերտի և Շուշիի թատրոնների երկարամյա գլխավոր ռեժիսոր, հայրենի քաղաք վերադարձած Լեոնիդ Հարությունյանը:
Միջոցառման ավարտին ՌԱԿ Հանրապետական վարչության ատենադպիր, Շիրակի շրջանակի ատենապետ ընկեր Հովիկ Կարապետյանը և պիեսի բեմադրիչները հանդես եկան շնորհավորական և երախտագիտության խոսքով` ուղղված նախաձեռնության հեղինակներին և իրենց կուսակցությանը` հովանավորության համար և, իհարկե, մեր սիրելի դերակատար-երեխաներին:
Միջոցառման մասնակից փոքրիկները իրենց հետ տարան «Միմզի մոլորակի» բնակիչների խորհուրդ-խրատներն ու համանուն պիեսի գունազարդ գիրքը:
Անահիտ Հովսեփյան
ՌԱԿ Շիրակի շրջանակի
«Փանոս Թերլեմեզյան» երիտասարդական ակումբի
ատենապետուհի
