«Ռուս խաղաղապահ զօրախումբի հրամանատարութիւնը որոշած է խաղաղապահներու պահեստներէն յաւելեալ ուժեր յառաջ քաշել` ատրպէյճանական զօրքերու հետագայ յառաջխաղացումը արգելափակելու համար», յայտարարութիւնը հրապարակուած է Լեռնային Ղարաբաղի մէջ առաքելութիւն իրականացնող ռուս խաղաղապահներու պաշտօնական թելեկրամեան ալիքով:
Յայտարարութեան կից հրապարակուած են լուսանկարներ, ուր կ’երեւին տասնեակ խաղաղապահներ` հրասայլերու վրայ, ծառայութիւն իրականացնելով:
Խաղաղապահ առաքելութիւնը կը յիշեցնէ, որ Մարտ 24-ին ատրպէյճանական զինուժը հատած է շփման գիծը` Փարուխ բնակավայրի աւերակներու տարածքին մէջ, որով խախտած է եռակողմ յայտարարութեան առաջին կէտը:
«Ներկայիս բնակավայրը կը գտնուի ռուս խաղաղապահ ուժերու վերահսկողութեան ներքոյ: Ուր մենք ենք, այնտեղ խաղաղութիւն է», նշուած է յայտարարութեան մէջ:
