Վարչապետ Նիկոլ Փաշինեանը Թեհրանի շրջակայքը տեղի ունեցած ողբերգական օդանաւային վթարի կապակցութեամբ ցաւակցական հեռագրեր յղած է Ուքրանիոյ նախագահ Վոլոտոմիր Զելենսքիին եւ Իրանի նախագահ Հասան Ռոհանիին, կը տեղեկանանք ՀՀ վարչապետի աշխատակազմի տեղեկատւութեան եւ հասարակայնութեան հետ կապերու վարչութենէն:
Ուքրանիոյ նախագահին յղուած հեռագրին մէջ ըսուած է.
«Յարգելի պարոն Զելենսքի,
Խոր վիշտով ստացայ Թեհրանի մօտակայքը «Ուքրանիոյ միջազգային օդագնացութեան ուղիներ»-ուն պատկանող օդանաւի կործանման ցաւալի լուրը:
Հայ ժողովուրդի եւ անձամբ իմ անունով խորին ցաւակցութիւն եւ զօրակցութիւն կը յայտնեմ զոհուածներու ընտանիքներուն եւ հարազատներուն: Այս դժուարին պահին մենք Ուքրանիոյ բարեկամ ժողովուրդի կողքին ենք»:
Իրանի նախագահին յղուած հեռագրին մէջ ըսուած է.
«Ձերդ Գերազանցութիւն,
Ցաւով տեղեկացայ 8 յունուարին Թեհրանի շրջակայքը տեղի ունեցած ողբերգական օդանաւային վթարի մասին, որ տասնեակ մարդկային զոհերու պատճառ դարձած է: Հայ ժողովուրդի անունով իմ խորին ցաւակցութիւնները կը յայտնեմ Ձեզ, զոհուածներու ընտանիքներուն եւ Իրանի բարեկամ ժողովուրդին»:
