Հայաստանի Հանրապետութեան անկախութեան 29-րդ տարեդարձի առթիւ վարչապետ Նիկոլ Փաշինեանին շնորհաւորական ուղերձ յղած է Ռուսաստանի Դաշնութեան նախագահ Վլատիմիր Փութինը: Այս մասին կը յայտնեն ՀՀ վարչապետի աշխատակազմի տեղեկատուութեան եւ հասարակայնութեան հետ կապերու վարչութենէն:
Ուղերձին մէջ, մասնաւորապէս, ըսուած է.
«Յարգելի Նիկոլ Վովայի,
Ընդունեցէք անկեղծ շնորհաւորանքներս Հայաստանի Հանրապետութեան Անկախութեան օրուան առթիւ:
Ռուսաստանի մէջ կը կարեւորեն Հայաստանի հետ բարեկամական, դաշնակցային յարաբերութիւնները:
Վստահ եմ, որ մեր երկիրներու կառուցողական երկխօսութիւնը, տարբեր ոլորտներու մէջ երկկողմ համագործակցութիւնը, ինչպէս նաեւ եւրասիական տարածքին մէջ համարկման գործընթացներու շրջածիրէն ներս փոխգործակցութիւնն այսուհետեւ եւս պիտի շարունակեն աշխոյժօրէն զարգանալ: Այն, անկասկած, կը համապատասխանէ ռուս եւ հայ ժողովուրդներու շահերուն, կ’ընթանայ տարածաշրջանային անվտանգութեան եւ կայունութեան ապահովման հունով:
Կը մաղթեմ Ձեզի, յարգելի Նիկոլ Վովայի, քաջառողջութիւն եւ յաջողութիւններ, իսկ Հայաստանի բոլոր քաղաքացիներուն՝ խաղաղութիւն եւ բարեկեցութիւն»։
ՌԴ նախագահը շնորհաւորական ուղերձ յղած է նաեւ ՀՀ նախագահ Արմէն Սարգսեանին, որուն մէջ ըսուած է.-
«Յարգելի Արմէն Վարդանի,
Ընդունեցէք ամենաջերմ շնորհաւորանքներս ազգային տօնի՝ Հայաստանի Հանրապետութեան Անկախութեան օրուան առթիւ:
Մեր երկիրներու յարաբերութիւնները կը հիմնուին բարեկամութեան եւ փոխադարձ յարգանքի աւանդոյթներուն վրայ: Դաշնակցային յարաբերութիւններու, բազմակողմ համագործակցութեան հետագայ զարգացումը, անկասկած, կը բխի մեր եղբայրական ժողովուրդներու երկարաժամկէտ շահերէն եւ կը նպաստէ խաղաղութեան, կայունութեան եւ անվտանգութեան ամրապնդման տարածաշրջանին մէջ:
Անկեղծօրէն կը մաղթեմ Ձեզի քաջառողջութիւն եւ յաջողութիւններ, իսկ Հայաստանի բարեկամ ժողովուրդին՝ բարօրութիւն եւ բարգաւաճում»:
