Վարչապետ Նիկոլ Փաշինեանը հեռախօսազրոյց ունեցած է Եւրոպական խորհուրդի նախագահ Շառլ Միշելի հետ:
Վարչապետի աշխատակազմէն յայտնած են, որ ՀՀ վարչապետը եւ Եւրոպական խորհուրդի նախագահը քննարկած են Հայաստան-ԵՄ յարաբերութիւններուն վերաբերող հարցեր: Կողմերը պատրաստակամութիւն յայտնած են աւելի զարգացնել ՀՀ-ԵՄ յետագայ համագործակցութիւնը, այդ շարքին՝ առեւտրատնտեսական կապերը:
Քննարկման առանցքը եղած է Հայաստանի մէջ իրականացուող ժողովրդավարական բարեփոխումներու օրակարգը: Եւրոպական խորհուրդի նախագահն ընդգծած է, որ կը կարեւորէ Հայաստանի ընտրած բարեփոխումներու ճանապարհը:
Հեռախօսազրոյցի ընթացքին Նիկոլ Փաշինեանը եւ Շառլ Միշելը միտքեր փոխանակած են Յունիս ամսուն Պրիւքսէլի մէջ կայանալիք Արեւելեան գործընկերութեան առաջիկայ գագաթնաժողովէն իրենց սպասելիքներուն շուրջ:
Հեռախօսազրոյցը տեղի ունեցած է հայկական կողմի նախաձեռնութեամբ:
