7 Յուլիսին Գեղարքունիքի մարզի Շողակաթ խոշորացուած համայնքի Շողակաթ բնակավայրին մէջ բացուած է հանրահռչակ շանսոնյէ Շարլ Ազնաւուրի անունը կրող այգի-պուրակ։ Այս մասին կը յայտնէ Գեղարքունիքի մարզպետարանը:
Միջոցառմանը մասնակցած են Գեղարքունիքի մարզպետ Գնել Սանոսեանը, Շողակաթ համայնքի ղեկավար Սուլիկօ Շուշանեանը, համայնքի բնակավայրերու վարչական ղեկավարներ, համայնքի բնակիչներ եւ հիւրեր։
Այգի-պուրակը կառուցուած է ՀՀ կառավարութեան կողմէ իրականացուող նպաստային ծրագրերու շրջածիրէն ներս։ Շինարարական աշխատանքները մեկնարկած են 2020 թուականի Յուլիսէն եւ աւարտած այս տարուան Յունիսին։ Այգի-պուրակին մէջ տեղադրուած է շատրուանային եւ լուսաւորութեան համակարգ, կառուցուած է բեմական հատուած եւ տեղադրուած է Շարլ Ազնաւուրի կիսանդրին՝ քանդակագործութեամբ Գերասիմ Շահվերդեանի։ Շինարարութեան պայմանագրային արժէքը կազմած է 18 միլիոն 860 հազար դրամ, որու 45 տոկոսը յատկացուցած է ՀՀ կառավարութիւնը, 55 տոկոսը` Շողակաթի համայնքապետարանը։
