Ռուսական խաղաղապահ ուժերու ջանքերով` 16 դեկտեմբերի դրութեամբ` ապահովուած է աւելի քան 40 հազար արցախցիի անվտանգ վերադարձը Լեռնային Ղարաբաղ: «Արմէնբրես»-ի փոխանցմամբ` այս մասին յայտնած է Ռուսաստանի Դաշնութեան Պաշտպանութեան նախարարութեան պաշտօնական կայքը:
«16 Դեկտեմբերի դրութեամբ` ապահովուած է աւելի քան 40 հազար արցախցիի անվտանգ վերադարձը Լեռնային Ղարաբաղ: Մարդասիրական ականազերծման կեդրոնի ռուս մասնագէտները ականազերծած են 195 հա տարածք եւ 60 քմ ճանապարհ: Յայտնաբերուած եւ ոչնչացուած է աւելի քան 6 հազար պայթունավտանգ առարկայ»,- ըսուած է հաղորդագրութեան մէջ:
Ռուսական խաղաղապահ առաքելութեան բժիշկները Ստեփանակերտի դաշտային հիւանդանոցին մէջ օգնութիւն ցոյց տուած են 29 բնակիչի, այդ շարքին` 4 երեխայի: Մարտակերտ քաղաքին մէջ եւս աւարտած է երկրորդ ռազմական հիւանդանոցի բացումը: Այնտեղ բժշկական օգնութիւն ցոյց տրուած է ընդհանուր առմամբ 558 բնակիչի, այդ շարքին` 67 երեխայի:
«Կարմիր Խաչի միջազգային կոմիտէի ներկայացուցիչներու հետ համատեղ կը շարունակուի հայկական եւ ատրպէյճանական կողմերու միջեւ զոհուածներու մարմիններու փոխանակումը, ինչպէս նաեւ անհետ կորածներու որոնումը»,- նշուած է ՊՆ կայքին մէջ:
