Եւրոմիութիւնը կոչ կ’ընէ Հայաստանին եւ Ատրպէյճանին օգտուելու «պատմական հնարաւորութենէն»` լուծելու տարաձայնութիւնները, եւ վերադառնալու բանակցութիւններու սեղանի շուրջ:
«Մենք կոչ կ’ընենք երկու երկիրներու ղեկավարներուն օգտագործելու պատմական հնարաւորութիւնը այս հակամարտութիւնը վերջնականապէս լուծելու եւ բովանդակալից երկխօսութեան վերադառնալու համար», ըսած է Հարեւանութեան եւ ընդլայնման հարցերով եւրոպական յանձնակատար Օլիվըր Վարհէին Եւրոխորհրդարանի լիագումար նիստին Պաքուի եւ Պրիւքսէլի միջեւ յարաբերութիւններու վերաբերեալ քննարկումներուն ժամանակ:
«Շատ կարեւոր հարցեր կը պահանջեն հրատապ լուծում», ընդգծած է յանձնակատարը:
Վարհէին լիակատար աջակցութիւն յայտնած է Եւրոպական Խորհուրդի ղեկավար Շարլ Միշէլի ջանքերուն, որոնք ուղղուած են Ատրպէյճանի եւ Հայաստանի ղեկավարներուն միջեւ երկխօսութեան խաղաղ գործընթացին առնչուող բոլոր հարցերուն շուրջ` ներառեալ ապագայ խաղաղութեան պայմանագիրը եւ սահմանազատումը:
Եւրոյանձնակատարի խօսքով` Եւրոմիութիւնը Հայաստանի մէջ առաքելութիւն տեղակայած է (EUMA) «լարուածութիւնը նուազեցնելու եւ խաղաղ գործընթացին աջակցելու համար»:
«Սա կարեւոր քայլ է կայունութեան ամրապնդման եւ տարածաշրջանին մէջ Եւրոմիութեան դերի ամրապնդման համար», ըսած է Վարհէին:
