Հետագային որոշում պիտի կայացուի Լեռնային Ղարաբաղի մէջ Ռուսաստանի դաշնութեան խաղաղապահ զօրակազմի ներկայութիւնը երկարաձգելու մասին։ Այս մասին յայտարարած է ՌԴ խաղաղապահ զօրակազմի նախկին հրամանատար, զօրավար-լեյտենանտ Ռուստամ Մուրատովը, կը հաղորդէ ԹԱՍՍ-ը։
«Միայն դրական կը գնահատեն ՌԴ խաղաղապահ զօրակազմի գործունէութիւնը։ Մեզի գնահատական կու տայ խաղաղ բնակչութիւնը․ այսօր ԼՂ-ի մէջ կեանքը կ’ընթանայ լիարժէք հունով։ Կան, ի հարկէ, շատ բարդ հարցեր, սակայն գործընթացը առաջ կ’երթայ՝ մարդոց վերադարձը, խնդրային հարցերու լուծումը։ Կը կարծեմ՝ ամէն ինչ նորմալ կ’ըլլայ»,-ըսած է Մուրատովը։
Ան աւելցուցած է, որ ռուս խաղաղապահները պիտի գտնուին Լեռնային Ղարաբաղի տարածքին մէջ 5 տարի։ «Առաջին 5 տարին՝ համաձայնագրով, որ ստորագրած են երեք պետութիւններու ղեկավարները։ Հետագային ռուսական խաղաղապահ զօրակազմի ներկայութիւնը երկարաձգելու մասին որոշում պիտի կայացուի»,-աւելցուցած է ան։
Ռուսաստանի հերոս Ռուստամ Մուրատովը 6 Սեպտեմբերին աւարտած է իր առաքելութիւնը որպէս ԼՂ-ի մէջ Ռուսիոյ խաղաղապահ զօրքերու հրամանատար։ Այժմ հրամանատար է զօրավար-մայոր Միխայիլ Քոսոպոքովը։
