ՀՀ Ազգային Անվտանգութեան Ծառայութեան (ԱԱԾ) պետ Արթուր Վանեցեան այսօր հրաժարեցաւ իր պաշտօնէն։
Վանէցեան այս մասին դիմատետրի իր էջով գրառում մը կատարեց մասնաւորապէս գրելով ՝
«Սիրելի′ հայրենակիցներ,
ՀՀ Ազգային անվտանգութեան ծառայութեան պատուարժա′ն զինծառայողներ,
Կը յայտնեմ ձեզի, որ ՀՀ Ազգային անվտանգութեան ծառայութեան տնօրէնի պաշտօնէն հրաժարականի դիմում ներկայացնելու որոշում կայացուցած եմ: Նման որոշումը ստեղծուած իրավիճակին եւ գալիքի պարունակին մէջ կը համարեմ Հայաստանի Հանրապետութեան եւ իմ ժողովուրդին ծառայելու ամենանախընտրելի եւ ամենահիմնաւորուած տարբերակը:
Այս որոշումը ես կայացուցած եմ նոյնքան վստահ, որքան այն մէկը, երբ մեր երկրի համար բախտորոշ փուլին համաձայնեցայ ստանձնելու Ազգային անվտանգութեան ծառայութեան տնօրէնի պաշտօնը: Մէկուկէս տարուան իմ գործունէութիւնը միշտ բոլորիդ աչքի առջեւ եղած է, եւ ամէն քայլ ըրած եմ մէկ սկզբունքով` Հայրենիքն ու սպայի պատիւը վեր են ամէն ինչէն:
Պետականաշինութիւնը իր տրամաբանութիւնը ունի․ որոշումներու տարերայնութիւնը, գործողութիւններու հախուռնութիւնը, առաջնայինը երկրորդականէն, իսկ անցողիկը մնայունէն չտարբերելու գործելաոճը այն ճանապարհը չէ, որ կը տանի դէպի նպատակներու իրականացում: Այն ընդհանուր ոչինչ ունի սպայի արժանապատւութեան հետ. սպայի ուսադիրն ու զարգացումներու նման ընթացքը անհամատեղելի են: Իմ հրաժարականը թող ըլլայ «Կանգ ա′ռ»-ի սթափեցնող քայլ, մնացած բոլոր տարբերակներուն պիտի յաղթէ հայրենիքի հանդէպ պարտքը:
Խաղաղութիւն ու անվտանգութիւն մեր երկրին:
Պատիւ ունիմ»։
Վանեցեան Ազգային անվտանգութեան ծառայութեան տնօրէնի պաշտօնը կը զբաղեցնէր 10 մայիս 2018-էն սկսեալ :
Յիշեցնենք, որ աւելի վաղ ՀՀ վարչապետ Նիկոլ Փաշինեան, որ կու տար բազմաբովանդակ թեմաներով մամլոյ ասուլիս մը անդրադարձած էր Վանեցեանի հրաժարման թեմային նշելով, որ ինք ստորագրած է Ազգային անվտանգութեան ծառայութեան տնօրէնի աշխատանքէն ազատելու միջնորդագիրը:
