Կազմակերպութեամբ Հալէպի Թէքէեան Մշակութային Միութեան, Շաբաթ,9 Ապրիլ 2022-ին, «Եկաւեան մատենադարան»ի սրահին մէջ տեղի ունեցած է միջ-դպրոցական ասմունքի աւանդական մրցումը:
Այս առթիւ միութեան դիմատետրի էջին վրայ հրապարակուած է հաղորդագրութիւն, որ կը ներկայացնենք ստորեւ.-
Թէքէեան Մշակութային Միութեան առաջնային նպատակը եղած է եւ կը մնայ հայկական մշակոյթի եւ հայոց լեզուի պահպանումն ու զարգացումը: Տարիներու ընթացքին ձեւաւորուած աւանդոյթները ցոյց կու տան այդ մէկը:
Այս շրջագիծէն ներս Ասմունքի մրցումը լաւագոյն խթանը կը հանդիսանայ հայ աշակերտին սիրտն ու հոգին առնչելու հայ գրականութեան հետ:
Յատկապէս ներկայ դժուար պայմաններու մէջ, օժանդակութեամբ Տիար Զաւէն Եկաւեանի, գործակցաբար Հայկական վարժարաններու տնօրէնութեանց եւ ուսուցիչներու, միջ-դպրոցական ասմունքի մրցումը առիթ եղաւ անգամ մը եւս քաջալերելու Հալէպահայ աշակերտները, որպէսզի գուրգուրան մայրենիին. Շաբաթ,9 Ապրիլ 2022, երեկոյեան ժամը 5-ին Թէքէեան Մշակութային Միութեան «Եկաւեան մատենադարան»ի սրահին մէջ տեղի ունեցաւ միջ-դպրոցական Ասմունքի մրցում, ներկայութեամբ՝ աշակերտներու, ուսուցիչներու եւ ծնողներու:
Բացման խօսքը կատարեց Միութեան ատենապետ Տոքթ. Յարութիւն Նազարեան: Ան բարձր գնահատեց յատկապէս ուսուցիչներուն ներդրումը սոյն ձեռնարկի յաջողութեան մէջ:
Աշակերտները ելոյթ ունեցան մեծ խանդավառութեամբ եւ ոգեւորութեամբ:
Առաջին դիրքը գրաւեց Արփի Գրտանեան (Կրթասիրաց Սարգիս Չեմպերճեան Վարժարան),
Երկրորդ դիրքը՝ Արինա Պօշկէզէնեան (Քարէն Եփփէ ազգ. Ճեմարան),
Իսկ Երրորդ դիրքը՝ Լոռի Մաթոսեան (Լ. Նաճարեան Գ. Կիւլպէնկեան Վարժարան):
Աւարտին յատուկ գնահատագիրներ տրուեցան դատական կազմի անդամներուն, նիւթական պարգեւներ՝ բոլոր մասնակիցներուն ու յաղթողներուն:
Վարձքերնիդ կատար:
Թէքէեան Մշակութային Միութիւն
