Փարիզի մէջ պղծած են հայ մեծանուն երգահան Կոմիտասի յուշարձանը։ Այս մասին Facebook-ի իր էջին գրած է օգտատեր Անժելա Քժտրեանը։
«Վանտալիզմը «Քորոնա» ժահրի օրերուն…
Փարիզի մէջ Հայոց ցեղասպանութիւնը խորհրդանշող` Կոմիտասի արձանին վրայ գրած են «Կեղծիք է»»,-գրած է ան եւ տեղադրած՝ յուշարձանի լուսանկարը:
Նշենք, որ հայկական յուշարձաններու նկատմամբ վանտալիզմի նման աղաղակող դէպքերը յաճախակի դարձած են հայ-ատրպէյճանական սահմանին տաւուշեան մարտերէն ետք։
1983- ին Փարիզի հայ համայնքը դիմեց քաղաքապետարան՝ խնդրելով Հայոց ցեղասպանութեան զոհերու եւ հայ մեծանուն երգահան Կոմիտաս Վարդապետի յիշատակին նուիրուած յուշարձան կառուցել:
Պրոնզով պատրաստուած չորսմեթրանոց արձանը տեղադրուած է 2 մեթր բարձրութեամբ պատուանդանի վրայ։ Յուշարձանի կառուցման աշխատանքները սկսած են 2002 թուականի յունուարին եւ աւարտած 2003 թուականի 22 ապրիլին:
Յուշարձանին վրայ գրուած է. «Ի յիշատակ Կոմիտաս վարդապետի եւ 1915 թուականի Հայոց ցեղասպանութեան 1,5 միլիոն զոհերուն»:
