24 սփիւռքահայ բարձրակարգ մասնագէտներ կը սկսին աշխատանքը ՀՀ կառավարութեան մէջ։ Այս մասին կը յայտնեն Սփիւռքի գլխաւոր յանձնակատարի գրասենեակէն։
«Անոնք այսօրուընէ կը մեկնարկեն: Առաջին փուլով 24 սփիւռքահայ բարձրակարգ մասնագէտներ կը սկսին աշխատանքը ՀՀ կառավարութեան մէջ: Գանատայէն, Դանիայէն, Ռուսաստանէն, Լիբանանէն, Ֆրանսայէն, Նորվեկիայէն մինչեւ Իսրայէլ, Հոլանտա ու Չինաստան. անոնց նոյնիսկ համաճարակը չէ խանգարած հասնելու Հայաստան:
Ծրագրի մասնակիցները ողջունեց ու բարի գալուստ մաղթեց Գլխաւոր յանձնակատար Զարեհ Սինանեանը: Յանձնակատարը յոյս յայտնեց, որ անոնք հայրենիքի մէջ կ’ունենան անփոխարինելի աշխատանքային փորձառութիւն:
Այնուհետ մասնակիցներուն «Դէպի Հայք» հիմնադրամի տնօրէն Սեւան Գապագեանը եւ «RepatArmenia» հիմնադրամի համահիմնադիր Վարդան Մարաշլեանը ներկայացուցին հայաստանեան պետական մարմիններուն մէջ աշխատելաոճի առանձնայատկութիւնները եւ միջավայրին արագ ընդելուզման համար գործնական խորհուրդներ տուին:
COVID-19-ով եւ օդային սահմանափակ հաղորդակցութեամբ պայմանաւորուած՝ ծրագրի մուս մասնակիցները Հայաստան պիտի ժամանեն քիչ մը աւելի ուշ», – նշուած է հաղորդագրութեան մէջ:
