Էրտողանն իր ռազմածովային ուժերէն պահանջած է խորտակել յունական նաւերէն մէկը։ Այս մասին գրած է գերմանական «Die Welt» պարբերականը՝ յղում ընելով իր ռազմական աղբիւրներուն։
«Էրտողանի հաշուարկած պատերազմը» յօդուածին մէջ տեղ գտած է հետեւեալ արտայայտութիւնը․ «Եթէ Էրտողանին հայեցողութեան մնար, ապա Թուրքիան արդէն խորտակած կ’ըլլար յունական նաւերէն մէկը»։
Ermenihaber-ի փոխանցմամբ՝ պարբերականը նշած է, որ օրեր առաջ Էրտողանը թուրք զօրավարներէն պահանջած է խորտակել Յունաստանին պատկանող նաւը, բայց այնպէս, որ ոչ ոք տուժէ։ Այդ առաջարկը, սակայն, մերժուած է թուրք բարձրաստիճան զինուորականներու կողմէն։
Այդ ժամանակ ստացած են երկրորդ նմանատիպ առաջարկը՝ խոցել յունական ռազմական օդանաւերէն մէկը, սակայն այս առաջարկն ալ մերժուած է զօրավարներու կողմէն:
