Անդրկովկասի մէջ ճանապարհային հաղորդակցութիւններու ապաշրջափակման շուրջ բանակցութիւններու լաւագոյն ձեւաչափը եռակողմ աշխատանքային խումբն է՝ Ռուսիոյ, Հայաստանի եւ Ատրպէյճանի փոխվարչապետներու համանախագահութեամբ։ Այս մասին յայտնած է Ռուսիոյ Արտաքին Գործոց նախարարութեան պաշտօնական ներկայացուցիչ Մարիա Զախարովա՝ խօսելով «Զանգեզուրի միջանցքի» հետ կապուած Երեւանի ու Պաքուի միջեւ տարաձայնութիւններու առնչութեամբ Մոսկուայի դիրքորոշման մասին։
Անոր խօսքով՝ այդ ձեւաչափով արդէն 8 նիստ կայացած է, եւ բոլոր կողմերը բարձր գնահատած են աշխատանքային խումբին գործունէութիւնը։ «Մենք ճիշդ կը համարենք հաւատարիմ մնալ յայտարարութիւններուն եւ քայլերուն, որոնք կը նպաստեն Անդրկովկասի մէջ տնտեսական եւ ճանապարհային կապերու ապաշրջափակման հարցով եռակողմ համաձայնութիւններու իրականացման», նշած է Զախարովա։
